އުނގަންނައިދިނުމުގައި ޓެކުނޮލޮޖީގެ ވަސީލަތްތައް ބޭނުންކުރުމަށް ބޭނުން ނުވާ މުދައްރިސުންނާ ތިބާއާ ބައްދަލުވޭ ހެއްޔެވެ؟ ނުވަތަ ޓެކުނޮލޮޖީ ބޭނުންކުރާނެގޮތް ރަނގަޅަށް ނޭނގޭ މުދައްރިސުން މިހާރުވެސް އުޅޭ ހެއްޔެވެ؟ ވޭތުވެދިޔަ ދިހަ ވަރަކަށް އަހަރު ތެރޭގައި މިފަދަ ގިނަ މުދައްރިސުންނާ އެކި ފަހަރުމަތިން އަޅުގަނޑާ ބައްދަލުވިއެވެ. އިސްކޫލުތަކާއި މަތީ ތައުލީމުދޭ މަރުކަޒުތަކުންނެވެ. އުނގަންނައިދިނުމުގައި ޓެކުނޮލޮޖީގެ ވަސީލަތްތައް ބޭނުންކުރުމުގެ އަޑުތައް ގަދަވެފައިވާ ޒަމާނެއްގައި މިކަން މިހެން ދިމާވަނީ ކީއްވެ ހެއްޔެވެ؟
އުނގަންނައިދިނުމުގައި ޓެކުނޮލޮޖީގެ ވަސީލަތްތައް ބޭނުންކުރުމަށް މުދައްރިސުން ދެކޮޅުހަދާ އާއްމު ސަބަބު، މުދައްރިސުންގެ ޓެކުނޮލޮޖީގެ ހޭލުންތެރިކަމާ ގުޅިފައިވެއެވެ. މިގޮތުން ރަނގަޅު މައުލޫމާތު ލިބިފައި ނެތުމުގެ ސަބަބުން ޓެކުނޮލޮޖީގެ ވަސީލަތެއް ބޭނުންކޮށްގެން ކިޔަވައިދިނުމަކީ ރިސްކެއް ކަމުގައި ގަބޫލުކުރެވި، ރިސްކެއް ނެގުމަށް މުދައްރިސުން ޖެހިލުންވެއެވެ. އެހެނީ އުނގަންނައިދިނުމުގައި ދަރިވަރަށް ނަގުލުކޮށްދޭން ބޭނުންވާ މައުލޫމާތާއި ހުނަރު ފުރިހަމައަށް ފޯރުކޮށްދެވުމުގެ ކަށަވަރުކަން މުދައްރިސް ބޭނުންވެއެވެ. ޓެކުނޮލޮޖީގެ ވަސީލަތެއް ބޭނުންކުރުމުން މިކަށަވަރުކަން ކުޑަވާނަމަ، އުނގަންނައިދިނުމުގައި މިފަދަ ވަސީލަތެއް ބޭނުންކުރުމަށް މުދައްރިސް ޖެހިލުންވުމަކީ ޠަބީއީ ކަމެކެވެ. އެހެންގޮތަކަށް ބުނާނަމަ، ކިޔަވައިދިނުމުގެ މާހައުލީ ނިޒާމުގެ ތެރެއަށް ބޭރުންގެނެވި ތައާރުފު ކުރެވޭ ވަސީލަތެއް ބޭނުންކޮށްގެން “މުޖައްރިބު” ނޫން ނަތީޖާއެއް ނިކުމެދާނެ ކަމެއް ކުރުމަށް މުދައްރިސް ޖެހިލުން ވަނީއެވެ.
ދިރާސާތަކުން އެނގޭގޮތުގައި އުނގަންނައިދިނުމުގައި ޓެކުނޮލޮޖީ ބޭނުންކުރުމާއި ކުރެވޭ މިންވަރު މައިގަނޑު ދެކަމަކާ ގުޅިފައިވެއެވެ. އެއްކަމަކީ ޓެކުނޮލޮޖީ ބޭނުންކުރުމާ ބެހޭގޮތުން މުދައްރިސްގެ މައުލޫމާތު ހުރިމިންވަރަކާއި އެކަމުގެ ގާބިލުކަން ލިބިފައިވާ މިންވަރެވެ. މާނައަކީ އުނގަންނައިދިނުމުގައި ޓެކުނޮލޮޖީ ބޭނުންކުރާނީ ކޮންގޮތަކަށްކަން މުދައްރިސަށް އެނގުމާއެކު، ހަރުދަނާ ރަނގަޅުގޮތެއްގައި މި ވަސީލަތްތައް ބޭނުންކޮށްގެން ކިޔަވައިދެވޭނެކަމުގެ ގާބިލުކަން ހުރިކަމަށް މުދައްރިސަށް ގަބޫލުކުރެވޭ މިންވަރެވެ. އެހެނީ މުދައްރިސަށް މިކަން ގަބޫލުކުރެވޭނަމަ އެއީ ބޭނުންތެރި ވަސީލަތެއް ކަމުގައި އޭނާ ދެކޭނެއެވެ. ބޭނުންތެރި ވަސީލަތެއް ކަމުގައި ދެކޭނަމަ އުނގަންނައި ދިނުމުގައި އެވަސީލަތް ބޭނުންކުރުމަށް ބޭނުންވާނެއެވެ. ނުވަތަ ބޭނުންކުރާނެއެވެ. ނަތީޖާއަކަށް ވާނީ ކިޔަވައިދިނުމުގައި ޓެކުނޮލޮޖީގެ ވަސީލަތެއް ތަޖުރިބާކުރުމަކީ ނަގާ ރިސްކެއް ކަމުގައި ގަބޫލުކުރާ މިންވަރު މިފަދަ މުދައްރިސުންގެ ކުޑަވުމެވެ.
ދެވަނަ ކަމަކީ ކިޔަވައިދޭ މާހައުލާ ގުޅިފައި ހުންނަ އާދަކާދަތަކާއި ގަބޫލުކުރުންތަކާއި، މާހައުލުން ފަހިކޮށްދެވޭ ކަންކަމެވެ. މީގެތެރޭގައި ކިޔަވައިދިނުމުގެ ތެރެއިން ހާސިލުކުރަން ބޭނުންވާ މަގުސަދުތަކާއި ކިޔަވައިދެވޭ މާއްދާގެ ބާވަތް ނުވަތަ ޒާތާއި އެ މާއްދާ ކުރިއްސުރެ އުނގަންނައިދެމުން އައިސްފައިވާ ގޮތް ހިމެނެއެވެ. އެހެނީ ކިޔަވައިދިނުމަކީ ކިލާހުގައި ހިނގާ އުނގެނުމުގެ އާއްމު ހަރަކާތަކަށްވުރެ ފުޅާ މާނައެއްގައި މުދައްރިސުން ދެކޭ ކަމެއްކަމުގައި ފާހަގަކުރެވިފައި ވެއެވެ. މިސާލަކަށް، މުދައްރިސް ބޭނުންވާނީ ހިސާބު އިލްމުގެ ވަކި އެއްޗެއް، ސައިންސުގެ ވަކި ކޮންސެޕްޓެއް ނުވަތަ ކިޔުމުގެ ވަކި ހުނަރެއް ބޭނުންކޮށްގެން ލިޔުމެއް ކިޔަން ދަރިވަރަށް ދަސްކޮށްދިނުމަށެވެ. މިހެންވުމުން ކިޔަވައިދިނުމުގެ ފުޅާ މާނައަށްވުރެ ބޮޑަށް އުނގަންނައިދިނުމުގެ މަގުސަދަށް މުދައްރިސްގެ ވިސްނުން އަމާޒުވާކަމަށް ފާހަގަކުރެވެއެވެ. ނަތީޖާއަކީ ކިޔަވައިދިނުން ފަރުމާކޮށް، ލެސަންޕްލޭން ހެދުމުގައި ކިޔަވައިދޭން އެކަށައަޅާ ގޮތްތަކާއި، ބޭނުންކުރާނެ ގޮތްތަކާއި އާލާތްތައް، ފިލާވަޅުގެ މަގުސަދާ ފުށުއަރާ ނަމަ، ނުވަތަ ފުށުއަރައިފާނެ ކަމަށް މުދައްރިސަށް ގަބޫލުކުރެވޭ ނަމަ އެގޮތެއް ނުވަތަ އާލާތެއް ބޭނުން ނުކުރުމެވެ. މުދައްރިސާ ބީރައްޓެހި، ޔަގީންކަން ނެތް ޓެކުނޮލޮޖީގެ ވަސީލަތްތައް ބޭނުން ނުކުރުމެވެ.
މިނުކުތާގައި ފާހަގަކޮށްލަން ބޭނުންވާ އަނެއް ކަމަކީ މުދައްރިސްގެ ކިޔަވައިދިނުމުގެ މާހައުލުގައި ކަންކަން ބައްޓަން ވެފައިވާ ގޮތަކީ، އޭނާގެ ވިސްނުމަށް ނުފޫޒުފޯރުވާ ކަންތައްތަކެއްކަން ދިރާސާތަކުން ފާހަގަ ކުރެވިފައި ވާކަމެވެ. ޚާއްސަކޮށް އެކުގައި މަސައްކަތްކުރާ އެހެން މުދައްރިސުންގެ ވިސްނުމާއި ފިކުރުން، އުނގަންނައި ދިނުމުގައި ޓެކުނޮލޮޖީގެ ވަސީލަތްތައް ބޭނުންކުރުމާ މެދު މުދައްރިސް ދެކޭގޮތަށް އަސަރުކުރާކަން ފާހަގަކުރެވެއެވެ. ނަތީޖާއަކީ އެހެން މުދައްރިސުންގެ ރައުޔަށް ބުރަވެ، ކިޔަވައިދިނުމުގެ ވަކިގޮތަކީ، ނުވަތަ ޓެކުނޮލޮޖީގެ ވަކި ވަސީލަތެއް ބޭނުންކުރުމަކީ އެއްގޮތަކަށްވެސް ކޮށްގެންވާނޭ ކަމެއް ނޫންކަމުގައި މުދައްރިސަށް ވިސްނި، އެގޮތަށް އަމަލުކުރުމެވެ. ނުވަތަ މީގެ އަނެއް ކޮޅެވެ. އެއީ އޭގެ ޒާތުގައި މާބޮޑު މަންފާއެއް ނެތްގޮތެއް، ނުވަތަ އާލާތެއް ބޭނުންކޮށްގެން ކިޔަވައިދިނުމަކީ މާމޮޅުކަމެއް ކަމުގައި މުދައްރިސަށް ގަބޫލުކުރެވުމެވެ.
އިސްވެ ދިޔަ ސަބަބުތަކަށްޓަކައި ޓެކުނޮލޮޖީއަށް މުދައްރިސުން އަހުލުވެރި ކުރުވުމަށްޓަކައި ޕުރޮފެޝަނަލް ޑެވެލޮޕްމެންޓް ހަރަކާތްތަކުގެ ތެރެއިން ދެމެހެއްޓެނިވި މަސައްކަތްތަކެއް ކުރަން ޖެހެއެވެ. މިފަދަ ހަރުދަނާ މަސައްކަތްތަކެއް ކުރެވިއްޖެނަމަ ޓެކުނޮލޮޖީ ބޭނުންކުރުމުގެ މައުލޫމާތާއި ހުނަރުވެރިކަން މުދައްރިސުންގެ ބޮޑުވާނެއެވެ. އޭރުން ޓެކުނޮލޮޖީ ބޭނުންކުރުމަށް މުދައްރިސުންގެ ޖެހިލުންވުން ކުޑަވެ، އޭގެ ބޭނުންތެރިކަން ބޮޑުކަމަށް އިހުސާސްވާނެއެވެ. ދެވަނަ ކަމަކީ އުނގަންނައި ދިނުމުގައި ޓެކުނޮލޮޖީ ބޭނުންކުރުމުގެ އުސޫލެއް ނުވަތަ އާއްމު ސިޔާސަތެއް އިސްކޫލުން ކަނޑައަޅައި މުދައްރިސުންނާ ހިއްސާކުރުމެވެ. ނަމަވެސް މިފަދަ ސިޔާސަތެއް ވާންވާނީ އުނގަންނައިދެވޭ މާހައުލާއި، ކިޔަވައިދެވޭ ވަކިވަކި މާއްދާތަކުގެ ޒާތަށް ރިއާޔަތްކުރެވިގެން ހެދޭ އެެއްޗަކަށެވެ. އަދި މުދައްރިސުންނަށް އެކަށީގެންވާ ފަންނީ އެހީތެރިކަން ފޯރުކޮށްދެވޭ ނިޒާމަކާއެކު ހެދޭ އެއްޗަކަށެވެ. އޭރުން ޓެކުނޮލޮޖީއާމެދު ބީރައްޓެހި ނަޒަރަކުން ބަލާ މުދައްރިސުންވެސް ވަޒީފާގެ ގޮތުން ފުރިހަމަ ކުރަންޖެހޭ ކަންތައްތަކެއް ފުރިހަމަކުރުމަށް މިވަސީލަތްތަކުގެ ބޭނުންހިފަން ފަށާނެއެވެ. އާޚިރު ނަތީޖާއަކަށް ވާނީ، މަޑުމަޑުން ޓެކުނޮލޮޖީއަށް ފަރިތަ ބަޔަކަށް މުދައްރިސުން ވުމެވެ. ކިޔަވައިދޭ މާހައުލަކީ ޓެކުނޮލޮޖީ ބޭނުންކުރުމަށް ފަހި ތަނަކަށް ވުމެވެ. (ނޯޓް: މިލިޔުން ވަނީ 13 އޮކްޓޫބަރު 2019 ގައި، ސަން.އެމްވީ ގައި ޝާއިއުކުރެވިފައެވެ.)